الورشة الساااابعة fellow me سطايفية

السلام عليكم و رحمة الله وبركاته
صباحكم بالخير و نهاركم مبروك
كيما تعرفو اليوم الجمعة و قلت نخطف روحي نخيط حويجة و لا زوج
قبل ما نخرج للحوش و ندك راسي في المشينة قلت نحطلكم ورشة خفيف ضريف تشبه للروبة لي رايحة نخيطها ضك نشالله
هي مستورة ( باش ماتدخلش وحدة منكم و تقولي حرام عليك و تخيطي العرياان و بطاطي و باطاطا و نزيد نقولها انا نخيط كلش ليا و لخواتاتي خاطر نلبسوهم هنا بيناتنا اوكي)
نوليو لموضوعنا الروبة تحتاجي فيها 2ميترات نورمالمون كي يعود طولك ما يديباسيش 1.5 بيانسور من كتفك للارض ركزي مليح هزي الميطرة حطيها على اعلى نقطة في الكتف ديالك ههههه يعني من جهة الرقبة و تطلقي الميطرة نتاعك للارض و تزيدي شوي حق لخياطة و اونسيجامي تزيدي تطوالي في يومين هههههه
انا الصراحة المخلوقة لي درتلها الروبة (مرت خويا الثالثة) قدي برك ماهي طويييلة ماهي خشييينة و حبت تقدش بيها في عرس خوها صافي مادرتهاش عريييييضة هو نورمالمون تحتاجي 3 متر انا اختزلت الكتان و درت 2 متر ما كثرتش النقشااات بزاف ههههه التقشف
اااه و تقدري طبقي المودييل على اي نوع من الكتان و حتى تصلح موديل عباية فقط ديريلها الذرعين
كثرت الهدرة ياوو
اسناوني نكب فنجال قهوة و نكمللكم
هاه قلنا نسحق كتان و قالون ولا حاجة تبهي بيها و انا زدت لي زيستراس لي يلصقو بالحديد ذااات ااال
هاهو رسم تقريبي للموديل

نطبقو الكتان نتاعنا على ربعة و لا ليزيار جي من فوق و من تحت يعني عرض الروبة ميطرتين و طولها بطول الكتان و نتي تحبي تزيدي ولا تنقصي اووكييي

راكم فاهمين
اول حاجة نديروها نجملو الامام و الخلف و من بعد نسجفو الرقبة انا منحبش السجاف ولا لادوبلير تكون كبيرة بويسك مارايحة نخدم فيها والو ااالووغ عقبت عليها لبيي و حددتو مليييح
و هاو ليك

لخطوط لي رسمناهم قبيل في وسط البطن و الظهر هاذوك هوما لي فخونس ولا النقشات تحكميهم ب لي زيبانقل و تحدي تحتهم لافيزلين و تخيطيهم من فوق و من تحت على حساب عرض القالون و الخط لي جاي من اسفل الذراع للتحت ثم تكون حواف الروبة نتاعنا و كي تجمليها تكون لخياطة على برا كيما عبايات الفراشة
اااااووول راااايت

و بعد ما تخلصي تفصلي طراف طوال حق حزام و تخيطيهم من داخل على حواف الفيزلين في هاذ المرحلة هبلتني المشينة عليها نسيت ماصورتهاش بصح ساهلة حنا الهدف نشبحو الموتيف نتاع الكرش
جيييينا للموتيف انا مالقيتش واااااش نديييير شريت زوج الوان من القالون و خلطتهم في بعظاهم باش عطاوني لونين كيما الروبة
و هاو ليكم كيفاش حطيتهم

هنا جا دور لي زيستراس لي حكيتلكم عليهم جاني القالون سامط مالا حبيت نزيدلو من عندي بصح او خرج قالون فيه هاذ الحجرات من عند لاميزون ههههههه

و زدت مشيت الحجرات على حواف الرقبة و هذا هو الشكل النهائي

شوفي كيفاش لخياطة جي على لي كوتي قتلك تجملي الكتان من برا

و من خلف ماحبيتش تقعد فرطاسة هههه و ماحبيتش نشارجيها درتلها ابيين قالون

و انتهى بحول الله علابالكم كون راني حطيت خيطتها راني خلصت هههه بصح ماشي خسارة فيكم يا مصايب و في اللول و اللخر الفايدة لينا كامل هيا ليزيتوال لي زيتوال النجووم النجوم ستارز ستارز ههههههه و بالشينوية شينغ هاو ولا واش قال ساكورا هههههه
سلملم الى الورشة الثامنة لا حب ربي
ااه و لي تسرق الموديل و تنحي اسمي و تحطو في منتدى اوخر ولا في الفاسبوك للغاشي عليها دعوة نشالله يتحرقلها البيسي و يتبيراتلها الكونت و يحضرو جدها من النت اني قلت لي تفاسي اسمي ام وليدو و كريستال علابالي مايديروهااش هههههه انا خير ت مدونة عالمك نحط فيه ماشي بلاصة اخرى مالا ماتزعفونيش

و السلام عليكم و رحمة الله و بركاته

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.