بريوش هايل جربتو اليوم بعد تردد في كل مرة نجي ندير البريوش ونخاف مايجينيش مليح وخفيف قررت ودرت شوي courage وقلت لازم نود نديرو والحمد لله الحمد لله 
جاني مليح وهاهي ليكم الوصفة لازم نفيدكم بيها وانشاء الله تجربوها لكن راح نعترفلكم بحاجة ههههههههههههه
أنا الفرينة مكانش عندي الكمية اللازمة يعني ناقص شويييي برك ومعنديش لي يشريلي للاسف وزدت خفت كثر قلت درك يجيني باااااايز هههههه ولكن جاني مليح
اليكم المقادير:
250غ فرينة
4 ملاعق كبار سكر
ملعقة كبيرة خميرة الخبزمتكونش معمرة بزاف
نصف كاس حليب دافي
3 ملاعق كبار ماء زهر
50 غ زبدة بدرجة حرارة الغرفة
zeste de citron
بياض بيضة +بيضة كاملة
نصف م ص ملح
اولا حطي الخميرة في الحليب الدافي باش تتطلع وزيديلها شوي من السكر ملعقة صغيرة باش تساعدها على الطلوع وخليها على جنب
ثانيا : خلطي المكونات الجافة كلها مع بعض
ثالثا: خلطي ما زهر مع البيض وضربي شوي بالشوكة ، وضيفيلهم الحليب مع الخميرة هنا كي يكونو طلعو ،هاذو المكونات السائلة
رابعا: صبي المكونات السائلة على الجافة وشغلي pétrin اذا رح تستعمليها ركبي مضرب k وخليهم يتعجنو لمدة 5 د وضيفيلهم الزبدة في الاخير وخلي الخليط يزيد 5د أخرى يتعجن من بعد خليه يتخمر وغطيه بكيس بلاستيكي لمدة 45د
خامسا: الان حركيه بيدك بالراحة برك باش ميهبطش وزيدي خليه يتخمر للمرة الثانية ميطولش انا خلينو 20د من بعد حطيه في قوالب السيليكون أو شكليه كويرات وخليه يطلع 10 د تقريبا وشعلي الفرن 180° من بعد كي يطلع دهنيلو البيض وذرذري الجلجلان من فوق وحطيه في الفرن
ها هو بعد ما طاب وشوفو الخفة أنا قدمتو مع مربى الفراولة لي عملتو
اسمحولي كثرت الصور
تحياتي 
