انا واعوذ بالله من كلمة انا
..طالب جامعي سنة اولى وهنا بدات مشكلتي كيف.
.
انا ربحت هاد العام الباك 2024 بمعدل 13.4 
وهنا كانت خيبة املي وتحطم احلامي 
المهم كرهت كلش كي شفت المعدل من بعد قلت لازم نفرح لاني فرحت والديا الي كانوو ينتظروون في نجاحي بشغف فرحنا وفات الوقت وجاء وقت اختيار الشعبة وهذا اكره يوم في حياتي الله يلعن هدا اليوم 
..صراحة ما لقيت ما نخير ياك علابالكم 13 ما دير بيها والوو.…المهم حلم والديا وحلمي انا الصيدلة 
من بعد كلش تهدم المهم كان لازم عليا نخير حاجة.. خيرت وفات الوقت عطاوني حاجة عمري ما كنت متوقعها هي اصلا شعبة جديدة هاد العام وين دارووها ** علوم التمريض** هنا زدت كرهت كلش وندمت كي قريت وكي عقبت الباك ..المهم قلت غير هادي الشعبة اللي ما نقراهاش وقعدت نجري على الترونسفار ما لقيت ما ندير كيما قلت ياك 13 مادير والوو….المهم فات الوقت سجلت ورحت قريت الاسبوع الاول كي ما انفجرتش راني مليح الامر الاول الشعبة ماني فاهم فيها والللو وتاني امر البعد يعني نقرا في ولاية اخرى ما والفتش الاقامةالمهم الوقت يفوت وانا غيرنخمم وقلقان ديما وكاره كلش يعني تغيرت حياتي تماما 
..انا الطالب اللي كان ديما بشوش
يحب يقراا يضحك يلعب نهار كامل وانا فرحان حتى صحابي كانوو يحسدوني ويقولوولي عندك الوقت باه تقراا وديفوللي وتضحك وتلعب وخاصة كانت يعني معدلاتي عالية والحمد لله يعني كنت عايش حياتي
ودك..تغير شامل منذ ان ربحت الباك كرهت كلش ..المهم الوقت قاعد يفوت وحنا رانا نقراوو وكي يسقسيوني والديا نقولهم راني لاباس يعني مانيش حاب نحيرهم خاصة انو املهم اكل فيا لاني الوحيد الي بقا يقرا …ودك رانا قريب نخلصوو الفصل الاول وليت نلووم في رووحي علاه ما سجلتش في الباك 2024 بالاك كون عاودت العام ونقرا واش نحب ومن بعد نتفكر بلي الديلي فات .ونزيد نكره حياتي اكتر اكثر اكثر…..واحيانا نقوول العام الجاي نسجل يعني 2024 ومن بعد نقوول هكدا يروحولي عامين يعني كيما نخمم نلقاها مغلوقة في وجهي والله العظيم راني في غم تاع الصح كرهت الدنيا وحلاوتها كرهت كلش وساعات نقول العام الجاي وندير ترونسفار في ولايتي ونستراح المهم وليت نخمم في كلش المهم نحوس نلقا حل يعني قتلت روحي بالتخمام وليت كي ما نقراش ولا يعود عندي غير كور طول نجي نروح للدار يعني الولاية ماشي بعيدة بزااف على ولايتي المهم نهرب طول من تم لاني كاره نقراا تم وكاره واش راني نقراا يعني وليت انتهز الفرصة باه نجي نروح…والله مهما نحكي منقدرش نطلع واش في قلبي والله كرهت تاع الصح .…بليييز
اطلب من جميع الاعضاء ان يتفضلوو عليا بنصائح والله يجازيكم خاصة اصحاب التجربة يعني الجامعيين …بلييز في امس الحاجة اليكم.. هم اعيشه من بداية العام والان جيت ليكم بالاك نلقا حل هنا راني كاره بليييييز
الحل ،، ساهل بصح ماشي ملموس ،، أكثر الصلاة و الدعاء ..تستراح .. خاطرش سمع الله لمن حمد له ، مهما كانت حياتك حمد ربي و شوف لي تحتك ، أنا رني كثر منك وزيد صحابي 4 راهم في الخارج خدامين ،،، كل واحد في دولة اوروبية،،خلينا برك .
أنا راهاكل يوم تتغلق عليا و كل ماتزيد تتغلق نزيد نصلي كثر ..ربي فيه الخير واعلابالي درك يفرج ربي . انت صلي صلاة الإستخارة و اكثر منها و ادعيه في ليل .. و الله سميع عليم ….. قال الله تعالى : ( إِنَّا خَلَقْنَا الْأِنْسَانَ مِنْ نُطْفَةٍ أَمْشَاجٍ نَبْتَلِيهِ فَجَعَلْنَاهُ سَمِيعاً بَصِيراً) (الانسان:2) الآية تبينلك بلي مهما زادت عليك الهموم فهو إختبارمن المولى عز و جل زيادة على دخوللك على مستوى جديد و فيه المسؤولية … صايي دروك تكل على ربي و على روحك .. لا باك و لا ماك تتكل عليهم ..خاصك تسعى ..ماشي ترقد و تقول كرهت حياتي ..ا خويا قرا هد التمريض وحد من صحابي الاربعة راه خدام في بلجيك ماتحتقرش العمل .. نت قراها و حاول تبغيها باش تقدر تستوعبها و الله غير تنجح و يباركلك ربي فيها.. المهم كي تساهل عليك و تحكم روحك شوية ابدا تعاود في الباك مازاالك صغير خويا وزير روحك في اي حاجا تتقنها توصل …