واشراكم لحباب توحشتكم
اليوم قلت نحطلكم التفريشةالجديدة لي خيطتها للشمبرة و كنت وعدت سومة نحطلها تشوفها مالا قلت نبروفيتي و نحطلكم وريشة صغيرونة
تتعلمو فيها بلاك كشما تخيطو للعيد و توفرو شوي سوارد و نلقط شوي دعاوي ههههههه
كيما تعرفوني نضل ممحونة و نبدل كنت مدايرة الشمبرة في النوار والموف
وليت بدلتها بالتيركواز والمارون
وضك ظهرتلي نديرها باناشي هههههه
الخطوات ساهلين
اول حاجة تحكمي قيس المطرح نتاعك و لمخاد
جينيرالمون نفس القيس كامل
طبقي الكتان على 4 و تبعي معايا
كي تقطعي الحاشية هاذيك رايحة تحلي الكتان يجيك هكذا
و من بعد هاذوك القرنيات نجملو كل وحدة وحدها
و رايحة تتشكل عندنا الزاوية لي تدخل فيها حاشية المطرح راكي تسمعي اا تشوفي ؟؟؟؟
شوفيهولي كي يتخيط
راكي تسقصي على الكتان شريتو ب 120 الميترة
خدمت كاريات و مخاد و فضلي شوي
شريت كتان رووز خدمت بيه لي بانو نتاع الريدو والريدو خيرت واحد يشبة للكتان
و فضلي منو 30 سم هههه
لي فضل من الكتان غلفت بيه نتاع لكراسا لي في الكوزينة
كانو هكذا
غلفتهم و كففت الحاشية و ركبت الخيط لي يلصق في الكرسي
و درتلهم خياطة في النص باش يتثبتو مليح
و من بعد تحديهم و تركبيهم
ولي فضل من الريدو
درتو 4 نابات و شومان دوطابل ههههه زعمة
وهكذا فرشتها
وااااش قلتو تعاندوني ولا تقعدو تتفرجو ؟؟؟
هيا على خير
سلامات