السلام عليكم و رحمة الله تعالى و بركاته
واش راكم يا البنات؟؟
انا راني الحمد لله
راني درت الكوراج و هزيت المقص و خيطت اول روبة ليا بالطبع بعد ماقريت نصائحكم و توجيهاتكم يا الفحلات
الله يعطيكم الصحة
المهم مانطولش عليكم نبداو بسم الله
شريت 2.5 م قماش بيزو اسود و عندي ظهر كروشي نسجاتولي اختي في الغوز قلت نخيطو و خلاص
المهم تتبعت تعليماتكم طويت الكتان على 2 و زدت على 4 و اخذت المقاسات نتاعي و خفت الا جيني ضيقه هيا زدت فيهم شوية باه جيني مستعه خاطر مانحبش نلبس المشبوح
وهزيت المقص و بديت نقطع
و نحيت الظهر و الجزء الامامي فصلت الصدر
و من بعد فصلت الرقبة
مانعرفش مليح ندير التسجاف و اكتان بيزو درتلو غير ثنية خفيفة على الرقبة
و زدت درتلو بليات عند الصدر
و لصقت الصدر في الظهر
و زدت لصقت الجزء السفلي في الصدر
و ركبت الظهر نتاع الكروشي
و من الكتان الي بقالي فصلت الذرعين درتهم شوية طوال تحت المرفق خاطر رانا في الخريف
و لصقت كلش في بعضاه و خرجتلي الروبة كاملة مايخصها غير الحرج
و هذا الحرج الي شريتولها باغلات يجيو فوق الكروشي و قالون للرقبة و الوسطو الذرعين
درت الباغلات فوق الظهر نتاع الكروشي
و عندي ثاني ثلاث كاريات منسوجين صغار تابعين للظهر لصقتهم من قدام و درتلهم باغلات و لصقت القالون حول الرقبة و في الوسط
و زدت درت القالون على الذرعين مع العلم انو هذا القالون كامل لصقتو بيدي
و هاي ليكم الروبة كامله
يو يو يو يو يو
مبروك عليا اول روبة نخيطها و جاتني سوا سوا
خيطتها في يوم واحد بديت على 11 حتى 3 بدون انقطاع خلصتلها الخياطة خرجت شريت الحرج و في الليل سهرت معاها و ركبتولها كامل
و صبحت لابستها هههههههههههه
المهم ماتنساوش تعطيوني رايكم و تعليقاتكم بدون مجاملات نحتاج رايكم الصريح باه نعرف اخطائي وين و نصححهم مرة خلاف
سلااااااااااااااااااااااااااام