صباح الخير والورد والفل والياسمين حبيباتي كيما وعدتكم كل مرة نحطلكم وصفة من اللي طلبتوهم مني وراح نبدالكم اليوم بالسوفلي بعجينتي السحرية اللي ابتكرتها واللي ماتحتاجش عجن ولا دليك ومذاقو روعة روعة خفيف وساهل ومايحتاجش وقت جربوه واكيد راح تعتمدو الوصفة وماتنساوش تدعيولي معاكم
نخليكم مع الصور بالتفصيل الممل
بسم الله الرحمن الرحيم
مقادير العجينة
بصراحة عندي مدة وانا معتمدة هاد العجينة لانها خفيفة ومضمونة وماتاخدش وقت طويل وهي 1كاس حليب دافئ+مغرف كبيرة خميرة الخبز+مغرف كبيرة سكر+فنجال مليان زيت او ربع كوب اللي كيلت بيه الحليب+ملح
خلطي كل المقادير وزيدي كاس فرينة وخلطي بملعقة الخشب غطي الصحن بكيس وخليه 5د ثم زيدي الفرينة وعينك هي ميزانك زيدي بالشوية وخلطي حتى تتحصلي على عجينة طرية ماشي يابسة ادهنيها بالزيت
وحطيها في كيس وخليها تتخمر
في هدا الوقت حضري الحشو انا ماكانش عندي اللحم المفروم عملتو بصدر دجاج طايب ومفتت
في مقلات حطي حبة بصل مقطعة مربعات صغيرة مع شوية زيت وملح
وكي تذبل زيديلها 2حبات كبار طماطم معصورة من الماء اللي فيها ومرحية بدون قشرة+سنة ثوم+ملعقة صغيرة طماطم مصبرة+ملعقة سكر لنزع الحموضة اللي في الطماطم خلي الكل على نار هادئة حتى تتركز الطماطم
وكي تطفي النار زيدي زيتون اخضر مقطع شرائح+الدجاج المفتت ولا اللحم المفروم الطايب في شوية زيت+ 50غ فروماج من الاحسن نوع باربار +علبة تونة طماطم لكن لما يطيب السوفلي مايبانش تماما ذوق التونة وفي نفس الوقت تعطي رطوبة كبيرة للعجينة جربوها على ضمانتي وخلطي الكل
كي تتخمر العجينة حليها على سطح مرشوش بالفرينة وشكليها
حطي الحشو في الجنب وحطي فوقو قطع من الفروماج وادهني جوانب العجينة ببياض بيضة واغلقي وكملي مع باقي العجين
رشي الفرينة فوق صينية الفرن وحطي حبات السوفلي وادهنيها بخليط متكون من صفار بيض ممزوج مع ملعقة كبيرة قهوة اللي راح تنزعلك زلخة البيض وتعطيك لون روعة للمعجنات وزينيها بالزيتون وبالجلجلان او السينوج كيما في الصور
دخليها مباشرة لفرن ساخن جدا من فوق وتحت مش راح تاخد اكثر من 5د
وقدميها وهي ساخنة
وهاذا شكلها من الداخل
ملاحظة... المقادير اللي عطيتهالك تعمل الكمية اللي في الصور
والآن دوركن راني في انتظار تطبيقاتكن