ما علاباليش منين نبدا …. أول مرة نجرأ نعبر عن وش في قلبي قدام مخلوق يا ريت نلقى عندكم الحل أو أي نصيحة تفيدني
حكايتي أنني كنت مخطوبة لواحد لمدة ثلاث سنين .. حبينا بعض لأقصى درجة لكن الضروف فرقتنا , ما كانش بيدنا القرار صرات مشاكل من طرف أمو لأنها كانت باغية تزوجو لبنت أختها و ولات تختلق فالمشاكل.. كبرت الأزمة بين العائلتين و طاح القدر كيما نقولو
المهم تأثرت بزاف بهاد الأزمة و بعد مدة تقدملي شخص ما عندي ما نقول فيه طيب جدا .. خطبني و درنا العقد و العرس بعد شهرين
رغم أنني مع زوجي منذ سنة إلا أني ما قدرتش ننسا خطيبي الأول .. صدقوني و لا لحظة غاب عن بالي والله ما بيدي الإحساس هدا.. ديما نستغفر و ندعي لكن ماقدرتش ننساه و الله ما قدرت ..دايما نقوم اليل و ندعي ربي ينحي من قلبي الشعور هدا و ينجيني م الفتنة لي راني فيها
زدت سمعت عليه بلي خطب بنت خالته لكنه فسخ الخطبة بعد أشهر و بعتلي وحدة قاتلي قالك أني مرضت و ما قدرتش ننساك و باغي نرجعلك لكن الوقت اداك كان فات الأوان كنت عاقدة
زوجي انسان رائع بأتم معنى الكلمة … حنين و يحبني بزاف و ديما يخمم فيا ما خلاني نحتاج والو معاه , ما يستاهلش نخمم في غيرو
صدقوني والله أول مرة نبوح لمخلوق بهاد الشيء .. حتى مع روحي ما نقولهاش الهدرة هدي
راني نتعدب و مالقيت حتى حل… كرهت روحي لأقصى درجة
ساعات نقول نطلب الطلاق من زوجي و نخليه يشوف حياتو أنا ما نستاهلش يحبني ولا يعيش معايا.. بصح و الله ما خنتو و اللي صرالي هدا فوق طاقتي و مش باختياري
وش الحل؟؟ نكمل في زواجي ولا نحبس هنا برك على الأقل ما نكونش ضريت انسان ما يستاهلش معايا؟؟
صدقوني ما حسبتش الأمر راح يولي هكدا .. كي قبلت نتزوج ضنيت روحي راح ننساه .. ياريتني ماقبلتش
قولولي وش ندير ؟؟
سامحوني على الإطالة لكني حاسة براحة كي تكلمت.. كنت محتاجة نعبر عن معاناتي