بسم الله الرحمن الرحيم
السلام عليكم
بطلب من أخواتي الغاليات في ركن واش طيبتي اليوم هاأنا نحط بين أيديكم وصفة ديسار إبتكاري السريع و لذيذ في نفس الوقت
نحكيلكم قصتو : أسيدي قالك زوجي كي روح من البلاد جاب معاه فواكه خوخ و برقوق و زعرورة و دلاع كبير أمالا حنا عائلة صغيرة و الحمد لله قعدوا في الثلاجة حبات قريب رايحين يفسدوا …. البارح حوست في النت لقيت وصفات كلها بالجلاتين و كيفيات طوال و تخلاط و أستناي 6 سوايع في الثلاجة إيييييييييييييه أيا و أنا ندور في الدار جاتني فكرة روحت نجري فتحت البلاكار و بديت هههههههه خفت تروحلي من مخي
شوفو هنا قشرت حبات خوخ و برقوق و جبدت بسكوي و عصير هذاك من البلاد علابالي عرفتوه ههههه
و الحاجة لي لقيتها تجمدلي الديسار في بلاصة الجيلاتين هو الفلون نعم الفلون بطعم الفانيليا مممممم
رحيت الخوخ و البرقوق كيما تشوفو و كيلتوا باش تعرفو القيس جاني نصف لتر…. حطيتو في طاوة زدتلوا كأس عصير خطرش عاقد + كيس فلون كميته تستعمل لنصف لتر سائل +ملعقة سكر و خلطت فوق النار بالفوي حتى الغليان
ممبعد غطست البسكوي بسرعة في ا لعصير و حطيتو فيالكؤوس الشفافة ثم فرغت خليط الخوخ و الفلون و خرجتهم يتبردوا ههههه
في هذه الأثناء طلعت شوية شانتيي و حطيتها تبرد في الثلاجة
شوفو هنا بعد ما بردو و جمدو مممم
درت الشانتييفي بوش طبعا أنا نخدمهم وحدي و زيني … ماكاش عندي قمع مشرشف حتى نهبط للبلاد و نشري باطة كيما نتاع أم ماجد هههههه عناد … نتي إذا عندك أستعمليه و زيني ثم درت خطوط بالشيكولاطة تقدري ديري كراميل و عاودي دخليهم للثلاجة لحين التقديم
ذوقه رهيب حتى زوجي تعجب فيه ههههه خوخ و فلون الفانيليا و شانتيي مممممم
ماشي شرط تتقيدي بالمقادير لعندي كيما البسكوي أستعملي واش عندك في البيت يا لوكان بيمو و العصير كذلك
السكر ذوقي درجة الحموضة و ديري عينك ميزانك و حسب ذوقك
سلاااااام