السلام عليكم ورحمة الله وبركاته
أتمنى تكونو بخير عزيزاتي
دائما مع تحلية من liégeois و لكن هذه المرة بالبرتقال…. هي وصفة سهلة سريعة إقتصادية مافيهاش البيض و لذيذة و منعشة مناسبة جدا لفصل الشتاء
المقادير
1/2 لتر عصير برتقال إستعملي لي يجي حامض و أصفر لأنه قريب من العصير الطبيعي
1 ملعقة أكل و نصف نشاء مغربل
2 ملاعق أكل سكر عادي و إذا كان العصير حلو بزاف ألغي السكر
كيس فانيليا
للتزيين : كرية شانتيي مخفوقة جيدا و متماسكة و برش برتقال أو أي شيء عندك للتزيين
هنا أنواع العصائر أنا إستعملت لي في الباطة طبيعي حامض أما القارورات من البلاد يجي حلو
في طاوة حطي عصير البرتقال + السكر +الفايليا +النشاء و خلطي بارد في بارد
ممبعد شعلي النار و أبقاي تحركي بدون توقف حتى يغلي و يعقد و راح تتحصلي على هذا القوام 
فرغيه في الكؤوس دائما نستعمل الجوتابل و لكن إذا عندك ضيوف إستعملي الزجاجية الشفافة ثم حطيه يبرد إما في الثلاجة أو في البالكون على الهواء حتى يبرد تماما
كي يبردو أمسحيلهم هذاك الندى في الحواشيي خطرش يهبط الشانتيي
و تكوني موجدة كريمة الشانتيي حطيها في جيب حلواني و شبحي الكؤوس ثم زيني ببرش البرتقال و الكراميل أو أي شيء آخر و عاودي دخليه الثلاجة يبرد قبل التقديم
نتمنى تجربوه لأنه فعلا رائئئئئئئئئئئع و يشهي
فقط ملاحظة ماتكثروش النشاء باش ماتجمدش الكريمة بزاف لأنها تقعد كأنها جولي خفيفة لكن متماسكة قليلا فقط هكذا
