تحلية اليوم راهي بنينة بنينة …….بزاف بنينة
هاذ التحلية اصولها فرنسيةهي تجي بالكريمة الانجليزية والكريمة لما تجتمع مع الكراميل ذوقا والله رهيب ولا يقاوم سماوها الجزيرة العائمة ممكن لانو شكلها مثل الجزيرة …….ممكن لكن ناكدلكم بالي لذتها لا تقاوم ونرجع ونقول الاكل اذواق
انا هنا استعملت 4 بيضات لكن هي في الحقيقة تجي ب 8 بيضات لكن حبيت نسهل عليكم التجريب لهاذا استعملت نصف مقادير 8 بيضات
نروحو للمقادير
4 بياض البيض
2 م ك سكر عادي
1 م ص فاني
5 م ك كراميل
الكريمة
4 صفار البيض
4 م ك سكر عادي
1 م ص فاني
نصف لتر حليب فايض وبارد
طريقة التحظير
اولا نطل البياض مثل الثلج ثم نضيفلو اثناء الخفق السكر والفاني
نحط الكراميل في صحن اينوكس
ثم نحاول نفرغ البياض غير بالشوية
نحط صحن الاينوكس في حمام مائي ولازم الماء يكون سخون
ثم الى الفور مدة10 د ثم نطفي ونشعل من فوق حتى يحمار شوية
راه ما يطولش بزاف لازم تعسيه
ثم حاولي باستعمال الموس تنحي التصاق البيض بالصحن على الجوانب
ونزليه في صحن التقديم غير بالشوية باش ما يتقلبش وحاولي هاذاك الكراميل اللي يبقى لاصق في الاسفل نزليه عليه من فوق
نروحو لتحظير الكريمة
نخلط الصفار والفاني مع الحليب غير بالشوية
ثم نحطو على نار ذليلة شوية ونبقى نحرك ما لازمش نتوقف
نحرك بملعقة خشبية او سيليكون
نحرك حتى نشوفها ثقالت
او ممكن تقلبي الملعقة كيما في الصورة وتعملي خط بصبعك اذا ما رجعش تلم يعني راهي واجدة
هنا حبيت نوضحلكم فقط ان نخدم بعينيا
ملاحظة مهمة
الكريمة ما لازمش تغلي على خاطر اذا غلات رايح تفزد وعلاه قلتلكم راهي حساسة في طيابها
نفرغها على جنب البياض الي يكون واجد في الصحن نفرغ غير بالشوية
نحطو في الثلاجة يبرد مليح على خاطر قد ما يبرد يجي بنين
انا عن نفسي ناكلو كي يبات
اثناء التقديم زيدي زينيه بالكاراميل
صدقوني راهي الكريمة الانجليزية ذوقها رهيب مع الكاراميل
يقدم في اكواب فردية او ممكن تجتمع العايلة عليه
راني كثرت الهدرة سامحوني بصح حبيت نشرح للاخوات الكريمات لانو كاين اخوات مبتدئات
ان شاء الله يعجبكم وينال رضاكم
في امان الله