من بين الاطباق والحلويات لي راني نجرب فيها باش نكتبها في مدونتي تاع التعرويس هههههههههه لازم يكون في الجهاز نظن مارانيش غير وحدي ندون 
جربت هادي الكيكة وخرجتى مليحة هي في الاصل اسمها gâteau à l’ananas caramélisé بصح جربتها بالبنان 
تحضير الكراميل
كاس سكر + ربع كاس ماء نخلوه فوق النار بلا ما نحرك وهذا الاهم مرة على مرة نحي الكسرونة من فوق النار ونحركها ونعاود نرجعها فوق النار حتى تولي كراميل قصدي من التحريك لا نستعمل مغرفة غير باليد فهمتوني
تحضير الكيك
نحتاج 3 بيضات
كاس سكر
2 كيسان فرينة
نص كاس زيت
نص كاس حليب
باكي خمارة
شوية لافاني
ورشة ملح
الا عندك نكهة الموز ضيفيها
الوصفة الحقيقية فيها برش البرتقال مع العصير انا استغنيت عنهم استعملت برش القارص
طريقة التحضير
نضرب البيض+رشة ملح لمدة 3 دقائق
ثم نضيف السكر ونستمر بالخفق مدة 5 دقائق
نضيف برش القارص + الزيت +الفانيلا + الحليب ونخفق مليح تولي كريمة خاثرة تشبه المايونيز هنا نتوقف عن الخفق
ونزيد الفرينة نغربلها ونضيفلها الخمارة وامبعد نبدا نضيفها للخليط وهنا نستعمل المغرف برك وندخل الفرينة بطريقة دائرية باش الخليط يبقي متجانس
نقطع 2 حبات بنان دوائر
نجيب مول يكون مدهون بالزبدة او الزيت نفرغ الكراميل وبعدها نستف دوائر البنان وبعدين العجينة ومباشرة للفرن
درجة الحرارة 180 الى 200 الفرن يكون ساخن قبل وضع الكيك
مدة الطهى 30-45 د
نشعل من فوق وتحت
نديرو فكرة الموس الا خرج ناشف طابت
نخلوها تبرد شوية وبعدين نقلوبها
وهادي صور الكيك ديالي
هادي من فوق
الكيك خرج رائع خفيف وبنين ويشبه الجينواز بصح القو البنان معجبنيش ربما يعجبكم قضية اذواق مي كي نشربوها مع القهوة مايبانش
كما قلت في البداية الكيك تجي بالأناناس او التفاح المرة الجاية ان شاء الله نطبقها بالاناناس وفي هذي الحالة نسقي الكيك بسيرو ديال الانانس
ممكن نطيبوها هكا
نتمنى تجربوها ومتنساوش التقيم