خُـياتي لحبابات حراير المنتدى وش راكم وش حالكم نتمنى انكم تكونو كامل بخير
بعد ما عجبكم الطبق البسكري التقليدي و زيد ربي يبارك فيكم ما بخلتونيش بالتشجيع راني قلت نحطلكم طبق تقليدي و لكن بتعديلات صغيرة
و ما يميز هاد الطبق انه خفيف على الأكلة الي سبقت
ياله نشمرو على يدينا و نقولو بسم الله
شوفو وش شراولي اليوم
يا ربي يا ربي وشحال زينة و حلوة و ……………………. امممممممممممممممممممم بنينة 
و تالمون الأفكار الشريرة الي في مخي ماحبتش تخطيني شوفو وش درت
و زدت وجدت حشوة بالضبط تشبه لكويرات الخضر لأم رامي زدت عليهم شوية روز برك
و حشيتها و فرميتها باعواد الكوردون و لحتها في الكوكوت مع زوج بصل مقطعين خشان و عود كرافس و دبشة "قسبر" و معدنوش و سنينتين ثوم و ملح و خليتها تقريبا ساعة الا ربع
و لما خرجتها درتلها درسة بالطماطم و الثوم و الفلفل الأحمر الحار و شوية توابل و لحتها في الفور تتحمر
اما مرقتها فصفيتها و طيبت بيها روز بالشعرية
و هو يجي بكمشة فارميسال تقليها في شوية زبدة جهد ما تحمار و بعدين امرقيها بكيلتين ما "انا درتلها مرقة الأرنوبة" و لوحيلها كيلة روز و نقصي النار عليها تماما تقريبا ربع ساعة طيب و تلقايها عملت ثقوب و الروز طاب طريقة بنييييييييييينة و ساهلة و يقعد الروز حبة بحبة
هاداك هو تحمرت الأرنوبة و شوفو النتيجة
و هادي شوية سلاطة كعادة الجزائريين
و شكون الي جات و زارتنا ليها هاد الطبق
هاه بربي قولولي خياتي مش هك خيرلها و خيرلي 
