التصنيف: الطبخ و الحلويات

عندي مدة مهبلة الأخوات باش يعطيوني وصفة حساء البصل والحق الاخوات مابخلوش عليا بصح بقيت خايفة نجربو مادخليش في راسي وخفت نديرو ونشبع تعليقات من عائلتي خاصة وأنني صاحبة سجل إجرامي من النوع الثقيل .

تفكرت انو الحساء وصفة فرنسية راقية مالا قلت نرجع للأصل ونجيب الوصفة من موطنها الأصلي ( ههههههههههههه زعمة نبتة ولا حشرة خخخخخخ ).

بحثت في مواقع فرنسية وعجبتني هذي الوصفة لأنها مختلفة شوية عن البقية جربتها وبصراحة رووووووووووووووووعة ومايبانش خلاص فيها طعم البصل .

بصراحة ماتوقعتش يجي مليح مالا ماصورتش المراحل بصح كي طلبوه الأخوات عاودتو وصورت المراحل .

ونزولا عند رغبة الأخوات اللي طلبو الوصفة هاهي :

المقادير :

* 2 حبات بصل كبااااااااااااااااااااااااااااااااااااااار
* 1 أو 2 راس فلفل حلو ( نقيه من البذور )
* 2 حبات بطاطا متوسطين او حبة كبيرة مقطعة مكعبات ( بطاطا بيضاء وليس الحمراء )
* 2 ملاعق كبيرة ماشي معمرين مليح فرينة مغربلة او 1 ملعقة تكون معمرة مليح
* ملح
* فلفل أسود
* 1 ملعقة كبيرة زبدة ( تعطي طعم خطير في الوصفة )
* 2 أو 3 ملاعق كبيرة زيت
* 1 مكعب مرق دجاج
* 2 ورقات رند
* جبن أبيض ( انا درت 8 حبات جبن مثلثات لازم تكثرو الجبن باش جي بنينة )
* حوالي 2 او 3 ملاعق كبيرة كرام فراش واللي ماعندهاش ممكن تعوضها بالحليب

الطريقة :

1- نقطع البصل والفلفل شرائح ونحطهم مع الزيت والزبدة ( الزبدة تعطيها اللمسة الراقية نتاع الطعم الفاخر )ونقلي مليح حتى يذبالو مليح .

2- كي يذبالو نزيد الفرينة المغربلة ونقلي فقط 2د .

3- كي تشوفو الفرينة بدات تتحمر نزيد البطاطا ونقلي فقط 2 د أخرى ( تحمار الفرينة سر 2 في الطعم )

4- نمرق بالماء بصح ماكثرش ممكن لأقل من 1 لتر ماء يعني يكون مستوى الماء مع مستوى الخضر يبقاو يبانو مايتغطاوش كليا لأنو الخضر يطيبو بسرعة مايحتاجوش ماء كثير .

5- نضيف التوابل وأوراق الرند ومكعب مرق الدجاج والملح غير شوية برك لأنو مكعب مرق الدجاج راهو فيه الملح وثاني الجبن رايح يزيد في الملوحة نتاع الحساء.

6- كي يغلي الماء نغلق الكوكوط ونخليها طيب حوالي 20-30د ونطفي.

7- نرمي الجبن في الحساء نتاعنا ونرحي الحساء بالبرا ميكسور مليح.

8- نرجع الحساء على النار ونضيف الكرام فراش أو الحليب ( من الأفضل كرام فراش ) ونخليه يهز الغلية 5د ونطفي.

9- نذوق الحساء إذا محتاج ملح نزيدلو .

* ملاحظة :
-إذا جاكم الحساء ثقيل بزاف: أنا ديما نزيد حليب وليس ماء باش يبقى بنين .
– الملح نعدلو على الأخير بعد مانكون زدت الجبن باش مايجيش الحساء مالح.
– ممكن تضيفو فيها جبن مبشور حسب الرغبة .

هاهي واجدة :

جربوه والله العظيم روووووعة ومايبانش خلاص باللي حساء بصل .
أختي كي شافتني نقلي في كمية كبيرة نتاع بصل قاتلي واش رايحة ديريلنا الشربة نتاع الشكشوكة بصراحة كرزت منها وكي ذاقتها هبلت عليها وقاتلي خبيلي صحن نديه معايا غدوة للخدمة قلتلها ماشي مليحة ليك الشربة نتاع الشكشوكة .

عذرا على رداءة الصور ندير في الحساء والبيتزا في نفس الوقت نصور بسرعة ، آسفة .